மாண்ப𑌼க்கெ𑌼ன் ப𑌼ாளெ𑌼 கத𑌼ி
ஒன்ட𑌼ெ𑌼 ஈர்ல் ஒன் மெ𑌼த்திரி ஒன்ட𑌼ெ𑌼 இத𑌼்த𑌼ெ𑌼. ஆ மெ𑌼த்திரி ப்யாரெ𑌼 த்யனம்ப𑌼்யாரெ𑌼 தானு. ஆ மெ𑌼த்திர்ல் மாண்ப𑌼க்கெ𑌼ன் அன்பெ𑌼னு ஒன் உட𑌼்க𑌼ித்தி இத𑌼்த𑌼ெ𑌼. மாண்ப𑌼க்கெ𑌼ன் தங்க𑌼ப𑌼்ப𑌼ி ப்யாரெ𑌼 கேத்தி. அம்மெ𑌼ன் ப்யாரெ𑌼 காள்ன். மாண்ப𑌼ாக்கெ𑌼ன் ப𑌼ெ𑌼ய்லியா உட்டாசெ𑌼க𑌼ாளெ𑌼, மூறாளு தானு. அல்லி எ𑌼ட𑌼்ட𑌼ாளு பெ𑌼ணாக்கெ𑌼ன் மக்கெ𑌼, ஒன்ட𑌼ாளு க𑌼ெ𑌼ணெ𑌼 மக𑌼்க𑌼ி தானு. மாண்ப𑌼க்கெ𑌼ன் ஸ்கோல்க்கா பே𑌼செ𑌼த𑌼ிலா. ஸ்கோல் கீர்லித𑌼ெ𑌼னு மே𑌼ட்ரெ𑌼க𑌼ெ𑌼 த𑌼ாரானிச்சிரி மெ𑌼த்திர்க்கா மக்கெ𑌼ர்ன குய்ட்னு போக𑌼ெ𑌼ல் ப𑌼னானி, மாண்ப𑌼க்கெ𑌼ன் தன் அண் மண்ப𑌼ாக்கெ𑌼ன பின தன் அக்கெ𑌼ன குய்ட்னு காப் தோட்லா ஏ𑌼ய்ரோட்டெ𑌼த𑌼ெ𑌼. அத𑌼ங்க𑌼ாய்னு அக𑌼ெ𑌼 மூறாளு ஸ்கோலெ𑌼 க்யல்தெ𑌼க𑌼ிலெ𑌼மு. மாண்ப𑌼க்கெ𑌼ன் தங்க𑌼ப𑌼்ப𑌼ி அம்மெ𑌼னப𑌼ெ𑌼ரு மக்கெ𑌼ர்ன ஸ்கோல்க்கா போக்க பெ𑌼த𑌼னி, எட்லானு ஏ𑌼ய்ர் பெ𑌼ய்ட்டு ப𑌼ுத𑌼்த𑌼ானி நங்க𑌼ெ𑌼ர்க்கா தானி ப𑌼ாள் பாட𑌼ெ𑌼 ஆப்மா, ஆஙப𑌼ெ𑌼ய்ரி மக்கெ𑌼ர்ன கீர்ல் தன்ன ப𑌼ுட𑌼ிக்கி, அன்ட𑌼ாட்டு மக்கெ𑌼ர்ன கீர்ல் தன்ன ப𑌼ுட்டெ𑌼க𑌼ெ𑌼. மாண்ப𑌼க்கெ𑌼ன் கிரி உட𑌼்க𑌼ித்தி மக𑌼்க𑌼ி இப்பெ𑌼ன் முத்கெ𑌼ர் ப𑌼ெ𑌼ய்லியா கத𑌼்த𑌼ெ𑌼லா பெ𑌼ய்ட்டு மீனெ𑌼 நண்ட𑌼ெ𑌼 புர்ச்செ𑌼னு எ𑌼ட்ன் ப𑌼ாண்ட்டு ஏக்கெ𑌼ரி அட்னு தின்ட𑌼ொட்டெ𑌼க𑌼ெ𑌼. மாண்ப𑌼க்கெ𑌼ன் பத்து வொய்செ𑌼 இப்பெ𑌼ன் தோட்ல்லா கூய்லி பெ𑌼ய்னிக்கா பே𑌼செ𑌼த𑌼ெ𑌼. மாண்ப𑌼க்கெ𑌼ங பானெ𑌼ட்டெ𑌼 வொய்செ𑌼 இப்பெ𑌼ன் த்யனம்ப𑌼்யாரெ𑌼 மெ𑌼த்திர்ல் இப்பெ𑌼 மூட𑌼்ன் அம்ப𑌼ெ𑌼 மன்செ𑌼ங மத𑌼ெ𑌼வெ𑌼 மாய்ர்னு கொட்டெ𑌼க𑌼ெ𑌼. அத𑌼ங்க𑌼ி மத𑌼ெ𑌼வெ𑌼 ஆய்னு அதெ𑌼ர்க்கா எ𑌼ட𑌼்ட𑌼ு பெ𑌼ணாக்கெ𑌼ன் மக்கெ𑌼 உட்டாசெ𑌼க𑌼ெ𑌼. ஆ எ𑌼ட𑌼்ட𑌼ு மக்கெ𑌼 பனெ𑌼ட𑌼்ட𑌼ாவெ𑌼த𑌼ெ𑌼க𑌼ுனு தானு க்யல்தெ𑌼னாட𑌼ெ𑌼க𑌼ெ𑌼. அத𑌼ெ𑌼ஙா முனி க்யல்த்தெ𑌼க𑌼ிலெ𑌼மு. பின அக𑌼ெ𑌼 எ𑌼ட𑌼்ட𑌼ாமெ𑌼ஙா மத𑌼ெ𑌼வெ𑌼 ஆசெ𑌼த𑌼ெ𑌼. அத𑌼ங்க𑌼ி மத𑌼ெ𑌼வெ𑌼 ஆய்னு அதெ𑌼ர்க்கா மக்கெ𑌼 அவொட𑌼ெ𑌼த𑌼ெ𑌼. இன மாண்ப𑌼ாக்கெ𑌼ன் கூய்லி பெ𑌼ய்னிக்கா தானு போப்பெ𑌼த𑌼ெ𑌼. மாண்ப𑌼க்கெ𑌼ன் தன் க𑌼ெ𑌼ணெ𑌼 மக𑌼்க𑌼ெ𑌼ப𑌼ெ𑌼ரு நலாய ப𑌼ாள்த𑌼்த𑌼ெ𑌼னு ப𑌼ன்ட𑌼ொட𑌼ெ𑌼க𑌼ெ𑌼.
இன் பெ𑌼த𑌼ெ𑌼னாட𑌼ெ𑌼 காய்ரிக𑌼ெ𑌼