காங்க𑌼ெ𑌼 அக𑌼்க𑌼ெ𑌼க𑌼ெ𑌼

ஒன் மெ𑌼த்திர்ல் நட𑌼ேனி அன்பெ𑌼னு ஒன்ட𑌼ெ𑌼 உட𑌼்க𑌼ித்தி இத𑌼்த𑌼ெ𑌼. ஒன்டெ𑌼 நட𑌼ேனி பின தன் அக்கெ𑌼ன், தன் கெ𑌼ரெ𑌼ன் இக𑌼் மூறாளு காங்க𑌼ெ𑌼 அக𑌼்த𑌼்த𑌼ெ𑌼னு எ𑌼ட்ன் ப𑌼ாட𑌼்லாயெ𑌼 பெ𑌼ய்ர்க𑌼ாட்க்க பே𑌼செ𑌼க𑌼ெ𑌼. அக்கெ𑌼ன் தன் கெ𑌼ரெ𑌼ன் எ𑌼ட𑌼்ட𑌼ாளு ஒன் காங்க𑌼ெ𑌼 குய்லியா நெ𑌼ய்ராட்டு காங்க𑌼ெ𑌼 அக𑌼்க𑌼ெ𑌼ல் தொட𑌼ெ𑌼ங்க𑌼ெ𑌼செ𑌼க𑌼ெ𑌼. ஆ குய்லியா அக𑌼்த𑌼்த𑌼ெ𑌼னு அக𑌼்த𑌼்த𑌼ெ𑌼னு பே𑌼செ𑌼க𑌼ெ𑌼. அன் ஆ காங்க𑌼ெ𑌼 குய்லியெ𑌼 அர்த𑌼்த𑌼 குய்லியெ𑌼 ஆசெ𑌼த𑌼ெ𑌼. அன்கிரி அக𑌼ெ𑌼 எ𑌼ட𑌼்ட𑌼ாமெ𑌼ஙா காங்க𑌼ெ𑌼 கெ𑌼ட்செ𑌼லா. அன் அக𑌼ெ𑌼 எ𑌼ட𑌼்ட𑌼ாளு இல்லி காங்க𑌼ெ𑌼 இலமா, நங்க𑌼ெ𑌼 ப𑌼ே𑌼ர் குய்லித்தெ𑌼ல் காங்க𑌼ெ𑌼 அக𑌼்க𑌼ெ𑌼ல் போக்கி எ𑌼ன்ட𑌼ாட்டு பே𑌼செ𑌼க𑌼ெ𑌼. அன் நட𑌼ேனி பெ𑌼ய்ட்டு அக𑌼ெ𑌼 மிந்த𑌼ி அக𑌼்த𑌼்த𑌼ெ𑌼 காங்க𑌼ெ𑌼 குய்லித்தெ𑌼ல் பெ𑌼ய்ட்டு காங்க𑌼ெ𑌼 அக𑌼்க𑌼ெ𑌼செ𑌼த𑌼ெ𑌼. அன் நட𑌼ேனிக்க காங்க𑌼ெ𑌼 கெ𑌼ட்செ𑌼த𑌼ெ𑌼.

2.அன் நட𑌼ேனி குய்லித்தெ𑌼ல் பட𑌼ெ𑌼 காங்க𑌼ெ𑌼 எ𑌼ட𑌼ெ𑌼ப்பெ𑌼ன் தன் அக்கெ𑌼ன் கெ𑌼ரெ𑌼ன் எ𑌼ட𑌼்ட𑌼ாளு நட𑌼ேனியா நோட𑌼்செ𑌼க𑌼ெ𑌼. அன் அக𑌼ெ𑌼 நங்க𑌼ெ𑌼 எ𑌼ட𑌼்ட𑌼ாளு காங்க𑌼ெ𑌼 அக𑌼்க𑌼ெ𑌼ன் நங்க𑌼ெ𑌼ர்க்க காங்க𑌼ெ𑌼 கெ𑌼ர்செ𑌼லமா, இத𑌼ெ𑌼ஙா மாத்திரி எட்டாங்க𑌼ி காங்க𑌼ெ𑌼 கெ𑌼ட்செ𑌼த𑌼ெ𑌼, எ𑌼ன்ட𑌼ாட்டு அக𑌼ெ𑌼 நட𑌼ேனி ப𑌼ிர்க்க பெ𑌼ய்ட்டு நட𑌼ேனொட𑌼 இசாங்க𑌼ுனு யங்க𑌼ெ𑌼மு காங்க𑌼ெ𑌼 ஈ குய்லித்தெ𑌼ல் அக𑌼்க𑌼ெ𑌼செ𑌼க𑌼ெ𑌼 ஆஙப𑌼ே𑌼ய்ரி நிய்யெ𑌼 ஈ காங்க𑌼ியா தாக𑌼ே எ𑌼ன்ட𑌼ெ𑌼க𑌼ெ𑌼. அன் நட𑌼ேனி அதெ𑌼ர்க்க காங்க𑌼ெ𑌼 கொட்டெ𑌼த𑌼ெ𑌼 இலா. அன் அக𑌼ெ𑌼 எ𑌼ட𑌼்ட𑌼ாளு நட𑌼ேனியா பார்கோலொட𑌼 அர்த𑌼்த𑌼ெ𑌼க𑌼ெ𑌼. அன்கிரி நட𑌼ேனி அதெ𑌼ர்க்க காங்க𑌼ெ𑌼 கொட்லா. பின நட𑌼ேனி ஆ காங்க𑌼ிய கெத்தாலாயெ𑌼 தொர்க்க எ𑌼ட்ன் பே𑌼செ𑌼த𑌼ெ𑌼. அன் இக𑌼ெ𑌼 எ𑌼ட𑌼்ட𑌼ாளு தொர்க்க பெ𑌼ய்ட்டு தொர் த𑌼ெ𑌼ட𑌼ல் கூட்னித𑌼ெ𑌼க𑌼ெ𑌼. அன் நட𑌼ேனி அதெ𑌼ரோட𑌼 நவெ𑌼 மாத்திரி ஈ காங்க𑌼ிய திம்ப𑌼ெ𑌼லானி நிங்க𑌼ெ𑌼 தானி ஈன திம்ப𑌼ெ𑌼க𑌼ெ𑌼, ப𑌼ாட்டு காங்க𑌼ெ𑌼 கெத்தாக𑌼ோ எ𑌼ன்ட𑌼ெ𑌼த𑌼ெ𑌼. அன் அக𑌼ெ𑌼 எ𑌼ட𑌼்ட𑌼ாளு காங்க𑌼ெ𑌼 கத்தெ𑌼ல் பேசெ𑌼க𑌼ெ𑌼. பின அக𑌼ெ𑌼 மூறாளு சே𑌼ர்ஜ்ஜெ𑌼னு காங்க𑌼ெ𑌼 கெத்தத𑌼ெ𑌼க𑌼ெ𑌼. பின அக𑌼ெ𑌼 மூறாளு சே𑌼ர்ஜ்ஜெ𑌼னு காங்க𑌼ிய கீர்க்க எ𑌼ட்னு பே𑌼செ𑌼க𑌼ெ𑌼. கீர்க்க எ𑌼ட்னு பெ𑌼ய்ட்டு திச்செ𑌼 உட்னு காங்க𑌼ிய ப𑌼ேவெ𑌼செ𑌼செ𑌼க𑌼ெ𑌼. பின காங்க𑌼ெ𑌼 ப𑌼ெந்த𑌼ெ𑌼த𑌼ெ𑌼.

அன் நட𑌼ேனி தன் அக்கெ𑌼ன் ப𑌼ென்னிப்பெ𑌼 காங்க𑌼ிய எ𑌼ட்னு தீர்ல்

எ𑌼ட்சாட்டு மூட்டி கய்ட்டாட்டு கீரி பொத𑌼்த𑌼ெ𑌼ல் எ𑌼ட்ன் கத𑌼்த𑌼ெ𑌼. ஆண தன் கெ𑌼ரெ𑌼ன் நெ𑌼ய்ராட்டு நட𑌼ேனொட𑌼பெ𑌼த𑌼்த𑌼ெ𑌼. அன் நட𑌼ேனி பெ𑌼ய்ட்டு மூட்டியா எ𑌼ட்ன் ப𑌼ாட்டு ப𑌼ென்னிப்பெ𑌼 காங்க𑌼ியா எ𑌼ட்னு ப𑌼ே𑌼ரி எ𑌼ட்சாட்டு, ப𑌼ேல் பட𑌼ெ𑌼 காங்க𑌼ியா எ𑌼ட்னு தீர்ல் மூட்டி கய்ட்னு பொத𑌼்த𑌼ுக்க எ𑌼ட்ன் கத𑌼்த𑌼ெ𑌼. நட𑌼ேனி தன் கெ𑌼ரெ𑌼ன் எ𑌼ட𑌼்ட𑌼ாளு காங்க𑌼ெ𑌼 தின்ட𑌼ெ𑌼க𑌼ெ𑌼. பின தன் அக்கெ𑌼ன் பொத𑌼்த𑌼ுக்க இப்பெ𑌼 மூட்டிய அல்சுட்னு நோட𑌼்ன் ப𑌼ேல் பட𑌼ெ𑌼 காங்க𑌼ெ𑌼 இத𑌼்த𑌼ெ𑌼.