அக் கால்த்தெ𑌼ல் கீர்ல்சமியெ𑌼 இப்பெ𑌼 பெ𑌼ணாக்கெ𑌼ன்ட𑌼ெ𑌼ர்க்க மக𑌼்க𑌼ி கெ𑌼ட்டெ𑌼 சமித்தெ𑌼ல், கீர்ல் கட்ட நோட𑌼்லாயெ𑌼 தன்ன ஆ மெ𑌼த்திர்ல் ஒனோன்ட𑌼ெ𑌼 பெ𑌼ணாக்கெ𑌼ன்ட𑌼ெ𑌼 இப்பெ𑌼க𑌼ெ𑌼. அக𑌼ெ𑌼 தனு ப𑌼ாட்டு கீர்ல்சமியெ𑌼 ஊத்தெ𑌼ர்க்க கீர்ல் கட்ட நோட𑌼ெ𑌼க𑌼ெ𑌼.
பின மக𑌼்க𑌼ி கெ𑌼ட்சானிஒன்ட𑌼ெ𑌼 ஒன் குய்ர்க்கெ𑌼ல் நீரெ𑌼 திசால்த்தெ𑌼ல் காசாட்டு ஒன் தீரிய எ𑌼ட்னு சூட𑌼் நீர்ல் முய்ல்கெ𑌼னு கீர்ல் கட்ட தித𑌼ே𑌼ய்னிப்பெ𑌼 பெ𑌼ணாக்கெ𑌼ன் பொட்ல் துட𑌼ெ𑌼க𑌼ெ𑌼. சூட𑌼ா துட்டானி தனு பொட்ல் பட𑌼ெ𑌼 க𑌼ாயெ𑌼 சன்ட𑌼ெ𑌼 அன்க𑌼ெ𑌼த𑌼ெ𑌼. கீர்ல் கட்ட நோட𑌼்லாயெ𑌼 ப𑌼ன்னிப்பெ𑌼 பெ𑌼ணாக்கெ𑌼ன் என்ப𑌼த𑌼ு நாள்க𑌼ுனு அதெ𑌼ர் கீர்ல் தன்ன இப்பெ𑌼த𑌼ெ𑌼. ஆ உட்டாய்னிப்பெ𑌼 மாக்க என்ப𑌼த𑌼ு நாள்த்தெ𑌼ல் அஜ்ஜாட𑌼ெ𑌼க𑌼ெ𑌼.
பின அத𑌼ெ𑌼 தித𑌼ெ𑌼சானி தனு ஆ பெ𑌼ணாக்ஙா கூய்லி கொட்டானி பின ஆ பெ𑌼ணாக்கெ𑌼ன் தன் கீர்க்க போப்பெ𑌼த𑌼ெ𑌼. அத𑌼ெ𑌼 தங் கீரோக்க போக𑌼ெ𑌼ல்த𑌼ி, ப𑌼ெ𑌼சாட்டி நீரெ𑌼 ஆய்ராட்டு பந்த𑌼ெ𑌼 காஜெ𑌼னு திதாட்டு, பின கீர்க்க போப்பெ𑌼க𑌼ெ𑌼. மக𑌼்க𑌼ி கெ𑌼ய்ட்னிப்பெ𑌼 பெ𑌼ணாக்ஙா மெ𑌼க்கிர்க𑌼ி, அன்கெ𑌼ன் மக்காயெ𑌼, உப்பெ𑌼, த்யாங்க𑌼ாயெ𑌼 சே𑌼ர்ச்செ𑌼னு மக்காயெ𑌼 அர்த்தெ𑌼னு நிச்செ𑌼 கொட𑌼ெ𑌼க𑌼ெ𑌼.
இன் பெ𑌼த𑌼ெ𑌼னாட𑌼ெ𑌼 காய்ரிக𑌼ெ𑌼