4. பாம்ப𑌼ெ𑌼
ஒன் பெ𑌼ணாக்கெ𑌼ன் கீர்ல்சமியெ𑌼 இத𑌼்த𑌼ெ𑌼. அத𑌼ெ𑌼 அல்லி இப்பெ𑌼 பெ𑌼ணாகெ𑌼ன்ட𑌼ெ𑌼 உன்லா நண்ட𑌼ெ𑌼 புட𑌼்லயெ𑌼 பே𑌼செ𑌼த𑌼ெ𑌼. அன் ஒன் காக்கி மாங்க𑌼ாயெ𑌼 தின்ட𑌼ி ப𑌼ிச்செ𑌼 உட்டித𑌼்த𑌼ெ𑌼. அன் அப் பெ𑌼ணாக்கெ𑌼ன் ஆ காக்கி முன்லித𑌼ெ𑌼னுமு மாங்க𑌼 பிச்செ𑌼 உட்டொட𑌼ெ𑌼த𑌼ெ𑌼 அன்பெ𑌼னு எப𑌼ெ𑌼னு ந்யன்த𑌼ாட்டு, பின ஆ பெ𑌼ணாக்கெ𑌼ன் காக்கிய நோட𑌼்லயெ𑌼 போப்பெ𑌼ன், ப𑌼ிர்கெ𑌼ல் இத𑌼ெ பெ𑌼ணாக்கெ𑌼ன்ட𑌼ெ𑌼 நிய்யெ𑌼 எட்ல்க்க பெ𑌼ய்யொட𑌼்த𑌼ெ𑌼 அன்பெ𑌼னு கே𑌼ட்டெ𑌼க𑌼ெ𑌼. அன் பெ𑌼ணாக்கெ𑌼ன் எட்ல்க்க இலமா, நவெ𑌼 இன ப𑌼ுப்பே𑌼னி எ𑌼ன்ட𑌼ாட்டு, ஆபெ𑌼ணாக்கெ𑌼ன் காக்கி பிமெ𑌼ஙா தன்ன பே𑌼செ𑌼த𑌼ெ𑌼. பின காக்கி பெ𑌼ய்ட்டு ஒன் த𑌼ப்பெ𑌼 மாங்க𑌼 ம்யட்தெ𑌼ல் கூட𑌼்செ𑌼செ𑌼த𑌼ெ𑌼. பின இப் பெ𑌼ணாக்கெ𑌼ன் மாங்க𑌼 ம்யரி உக்க ஏட𑌼்னு மாங்க𑌼ாய ஒன்ட𑌼க்க பட𑌼்லாயெ𑌼 ஏ𑌼ட்செ𑌼த𑌼ெ𑌼. பின ம்யரி உக்க நோட𑌼்ன் த𑌼ப்பு பாம்ப𑌼ெ𑌼 இத𑌼்த𑌼ெ𑌼. பின ஆண நேய்ராட்டு இப் பெ𑌼ணாக்கெ𑌼ன் ம்யட்தெ𑌼ல் இத𑌼ெ𑌼னு தாள்க்க உல்ஜெ𑌼த𑌼ெ𑌼. பின பாம்ப𑌼ெ𑌼 பெ𑌼ணாக்கெ𑌼னோட𑌼 யனிய நே𑌼ய்ட𑌼்னு நிய்யெ𑌼 பேட்செ𑌼ல் ப𑌼ாட𑌼மா நவெ𑌼 நினிய ஐன்ன கீல்லிலனி எ𑌼ன்ட𑌼ெ𑌼த𑌼ெ𑌼. பின பம்ப𑌼ெ𑌼 நின்க்க ஐன்ட𑌼ி ப𑌼ே𑌼டு எ𑌼ன்ட𑌼ெ𑌼த𑌼ெ𑌼. அன் பெ𑌼ணாக்கெ𑌼ன் யன்க்க மாங்க𑌼ாயெ𑌼 ப𑌼ே𑌼டுமு எ𑌼ன்ட𑌼ெ𑌼த𑌼ெ𑌼. அன் பாம்ப𑌼ெ𑌼 பெ𑌼ணாக்கெ𑌼னோட𑌼 நின்க்க நவெ𑌼 மாங்க𑌼ாயெ𑌼 பட𑌼்சே𑌼னு தப்பெ𑌼னி, நிய்யெ𑌼 யன்க்க ஒன் காய்ரியெ𑌼 கித𑌼்த𑌼ப்பெ𑌼லமா அன்பெ𑌼னு பாம்ப𑌼ெ𑌼 பெ𑌼த𑌼்த𑌼ெ𑌼. அன் பெ𑌼ணாக்கெ𑌼ன் நவெ𑌼 ஐன்ன கீவெ𑌼க𑌼ெ𑌼 எ𑌼ன்ட𑌼ெ𑌼த𑌼ெ𑌼. அன் பாம்ப𑌼ெ𑌼 பெ𑌼ணாக்கெ𑌼னோட𑌼 நின்க்க மிந்த𑌼ாய உட்டாப்பெ𑌼 மக𑌼்க𑌼ிய நிய்யெ𑌼 யன்க்க தன்ட𑌼ப்பெ𑌼லமா அன்பெ𑌼னு பெ𑌼த𑌼்த𑌼ெ𑌼. அன் பெ𑌼ணாக்கெ𑌼ன் சிரிமி எ𑌼ன்ட𑌼ெ𑌼த𑌼ெ𑌼. பின பாம்ப𑌼ெ𑌼 சிராய மாங்க𑌼ாயெ𑌼 பட𑌼்சே𑌼னு பெ𑌼ணாக்ங கொட்டெ𑌼த𑌼ெ𑌼. நிய்யெ𑌼 ஈ மாங்க𑌼ாய இசிரி யன் தின்னு தித்தாவெ𑌼த𑌼ெ𑌼 அன் நிய்யெ𑌼 நல்த𑌼ாப்பியெ𑌼மி அன்பெ𑌼னு பாம்ப𑌼ெ𑌼 பெ𑌼த்த𑌼ெ𑌼. பின பெ𑌼ணாக்கெ𑌼ன் மாங்க𑌼ாயெ𑌼 தின் தித𑌼ேட𑌼செ𑌼ஙா பெ𑌼ணாக்ங மக𑌼்க𑌼ி கெ𑌼ட்செ𑌼த𑌼ெ𑌼. பின பெ𑌼ணாக்கெ𑌼ன் ஈ மக𑌼்க𑌼ிய பாம்ப𑌼ெ𑌼க்க கொட𑌼்ல்த𑌼ீ கீர்ல் தன்ன ப𑌼ுட்னித𑌼்த𑌼ெ𑌼. பின பாம்ப𑌼ெ𑌼 நே𑌼ய்ரி நே𑌼ய்ரி ஈட்டு இன்க𑌼ுனு மக𑌼்க𑌼ி கெ𑌼ய்ட்னித𑌼்த𑌼ப்பெ𑌼லமா அன்பெ𑌼னு ந்யன்தெ𑌼த𑌼ெ𑌼. பின பாம்ப𑌼ெ𑌼 பெ𑌼ணாக்கெ𑌼ன தரேத்த𑌼ெனு பேசெ𑌼த𑌼ெ𑌼. பாம்ப𑌼ெ போப்பெ𑌼ன பெ𑌼ணாக்கெ𑌼ன் நே𑌼ய்ராட்டு மக𑌼்க𑌼ிய எ𑌼ட்ன் பெ𑌼ய்ட்டு ஒல்பிசெ𑌼னு காட்டு, மணல் மெரிய எ𑌼ட்னு கிக்கொக𑌼ி கெம்செ𑌼ன் கத𑌼்த𑌼ெ𑌼. பின பாம்ப𑌼ெ𑌼 பெ𑌼ய்ட்டு பெ𑌼ணாக்கெ𑌼னோட𑌼 மக𑌼்க𑌼ி உட்டசெ𑌼ஙா ஆய்னிஙா யனிப்பிலி எ𑌼ட்ன் ப𑌼ாட்டு தன்லி அன்பெ𑌼னு கே𑌼ட்டெ𑌼த𑌼ெ𑌼. அன் பெ𑌼ணாக்கெ𑌼ன் பாம்ப𑌼ொட𑌼 நவெ𑌼 மர்த𑌼ோனனி எ𑌼ன்ட𑌼ெ𑌼த𑌼ெ𑌼. பின பாம்ப𑌼ெ𑌼 சிரிமி இன மக𑌼்க𑌼ிய யனிப்பிலி தக𑌼ே எ𑌼ன்ட𑌼ெ𑌼த𑌼ெ𑌼. அன் பெ𑌼ணாக்கெ𑌼ன் யன் மக்க𑌼ிய தர்த𑌼ுட்ன் கத𑌼னி நிய்யெ𑌼 புய்ர்ப்பெ𑌼த𑌼ெ𑌼 அன்பெ𑌼னு கே𑌼ட்டெ𑌼த𑌼ெ𑌼. அன் பாம்ப𑌼ெ𑌼 நவெ𑌼 புட𑌼்ல் பட𑌼ெ𑌼 மக𑌼்க𑌼ி, நிய்யெ𑌼 தர்த𑌼ுன் காக𑌼ே எ𑌼ன்ட𑌼ெ𑌼த𑌼ெ𑌼. அன் பெ𑌼ணாக்கெ𑌼ன் கிக்கிய தர்த𑌼ுன் கத𑌼்த𑌼ெ𑌼. அன் பாம்ப𑌼ெ𑌼 மணல் மெரிய ஐய்ட்னுபே𑌼செ𑌼த𑌼ெ𑌼. அன் மணல் மெரியெ𑌼 ப𑌼ானுக்க பெ𑌼ய்ட்டு பெ𑌼ரி பிமெ𑌼ஙா ஒல்செ𑌼த𑌼ெ𑌼.பின பாம்ப𑌼ெ𑌼 பெ𑌼ரோட𑌼 மணலிய யனிலி தக𑌼ே என்ட𑌼ெ𑌼த𑌼ெ𑌼. அன் பெ𑌼ரி அத𑌼ெ𑌼 யன் ப𑌼ிர்க்கம ப𑌼ன்னட𑌼ெ𑌼த𑌼ெ𑌼. நவெ𑌼 நின்க்க தாட𑌼்லிலனி அன்பெ𑌼னு பெ𑌼த்த𑌼ெ𑌼. அன் பாம்ப𑌼ெ பெ𑌼ரி எ𑌼ட𑌼்ட𑌼ாளு பக𑌼ுட்டெ𑌼க𑌼ெ𑌼. ஆஙா தனு பொத்தெ𑌼 க𑌼ரணி ஆப்பெ𑌼 சமித்தெ𑌼ல் கீர்ல்சமியெ𑌼 இப்பெ𑌼 பெ𑌼ணாக்கெ𑌼ன்ட𑌼ெ𑌼ட𑌼்ன பொரிமி ப𑌼ாட𑌼்ல்த𑌼ிக்க பே𑌼வெ𑌼க𑌼ெ𑌼.
Literature Type
